ԹՈՒՂԹ ՊԵՏՐՈՍԻ ԱՌԱՋԻՆ[2981]

1
Գլուխ Ա

բզ 1 Պե՛տրոս առաքեա՛լ Յիսուսի Քրիստոսի, ընտրելոց նժդեհից որ ՚ի սփի՛ւռս Պոնտացւոց, Գաղատացւոց, եւ Կապադովկեցւոց, եւ Ասիացւոց, եւ Բիւթանացւոց[2982], 2 ըստ կանո՛ւխ գիտութեանն Աստուծոյ Հօր, սրբութեամբ Հոգւոյն, ՚ի հնազանդութիւն եւ ՚ի հեղումն արեա՛նն Յիսուսի Քրիստոսի։ Շնո՛րհք ընդ ձեզ եւ խաղաղութիւն բազմասցի[2983]։

Ա 3 Օրհնեա՛լ է Աստուած եւ Հայր Տեառն մերոյ Յիսուսի Քրիստոսի, որ ըստ բազում ողորմութեան իւրում ծնաւ զմեզ վերստին ՚ի յոյսն կենդանի. ՚ի ձեռն յարութեանն Յիսուսի Քրիստոսի ՚ի մեռելոց[2984], 4 յանեղծ եւ յանարատ եւ յանթառամ ժառանգութիւնն՝ որ պահեալ է յերկինս ՚ի ձեզ[2985]. 5 որ զօրութեամբն Աստուծոյ պահեալ էիք հաւատովք ՚ի պատրաստեալ փրկութիւնն, յայտնեալ ՚ի յետին ժամանակս[2986]. 6 որով ուրա՛խ լինիջիք, որք այժմ սակաւիկ ինչ ըստ պատշաճի իրացդ տրտմեա՛լք ՚ի պէսպէս փորձութիւնս[2987]։ 7 Զի հանդէս ձերոց հաւատոցն առաւե՛լ քան զոսկի կորստական պատուական է. որ հրով փորձեալ գտաւ, ՚ի գովութիւն եւ ՚ի փառս եւ ՚ի պատիւ ՚ի յայտնութեանն Յիսուսի Քրիստոսի[2988]։ 8 Զոր ո՛չն տեսէք՝ եւ սիրեցէք. ընդ որ այժմ ո՛չ հայեցեալք, բայց հաւատացէք. եւ ուրա՛խ էք անճառ եւ փառաւորեալ խնդութեամբն[2989]. 9 ընկալեալ զկատարումն հաւատոցն ձերոց զոգւո՛ցն փրկութիւն[2990]։ 10 Վասն որոյ փրկութեան խնդրեցին եւ քննեցի՛ն մարգարէքն. որք վասն որոյ ՚ի ձեզ լինելոց էին շնորհքն՝ մարգարէանայի՛ն[2991]. 11 քննէի՛ն յորո՛ւմ եւ յորպիսի՛ ժամանակի գուշակէր ՚ի նոսա Հոգին Քրիստոսի. որ նախ՝ չարչարանա՛ցն Քրիստոսի վկայէր, եւ յետ այնորիկ՝ զփառա՛ցն[2992]։ 12 Որոց եւ յայտնեցա՛ւ իսկ. զի ո՛չ թէ անձանց, այլ մե՛զ մատակարարք լինէին, նոցին՝ որք ա՛յժմ պատմեցան, այնոքիւք որք աւետարանեցի՛նն ձեզ Հոգւովն Սրբով որ առաքէրն յերկնի՛ց, զոր ցանկային տեսանել գոնեայ ընդ աղօ՛տ հրեշտակք[2993]։

Բ բէ 13 Որով պնդեալ զմէջս մտաց ձերոց՝ զուարթացեալք, բովանդակ սպասեցէ՛ք հասելոց ձեզ շնորհացն ՚ի յայտնութեանն Յիսուսի Քրիստոսի[2994], 14 իբրեւ զորդի՛ս հնազանդութեան. մի՛ կերպարանեալք առաջին ձերովք անգիտութեանն ցանկութեամբք։ 15 Այլ ըստ Սրբոյն որ կոչեաց զձեզ, եւ դո՛ւք սուրբք յամենայն գնացս ձեր լինիջի՛ք[2995]։ 16 Վասն որոյ գրեալ է, եթէ եղերո՛ւք սո՛ւրբ զի ես սուրբ եմ[2996]։ 17 Եւ եթէ Հայր կոչիցէք զայն, որ առա՛նց ակնառութեանն դատի ըստ իւրաքանչիւր գործոց. ապա երկիւղի՛ւ զձերոցն պանդխտութեան ժամանակդ գնասջի՛ք[2997]։ 18 Գիտասջի՛ք, զի ո՛չ ապականացու արծաթեղինօք՝ եւ ոսկեղինօքն փրկեցարուք ՚ի ձերոց ունայնութեան հայրենատուր գնացիցն[2998]. 19 այլ պատուակա՛ն արեամբն Քրիստոսի, իբրեւ անբիծ եւ անարատ գառին. 20 որ յառաջծանօ՛թ էր նախ քան զիսկզբանէ աշխարհի։ Եւ երեւեցա՛ւ ՚ի վախճան ժամանակաց վասն ձեր[2999]. 21 որք նովաւ հաւատացէք յԱստուած, որ յարոյց զնա ՚ի մեռելոց, եւ ետ նմա փառս. զի հաւատքն ձեր եւ յոյս իցեն յԱստուած[3000]։ 22 Զանձինս ձեր սրբե՛լ հնազանդութեամբ ճշմարտութեան Հոգւոյն, յեղբայրսիրութեան առանց կեղծաւորութեան, ՚ի սուրբ սրտէ սիրե՛լ սերտիւ զմիմեանս[3001]։ 23 Ծնեալք ՚ի վերստին ո՛չ յապականութեան սերմանէն. այլ յանապականացուէ՛ն, կենդանի եւ մշտնջենակա՛ն բանիւն Աստուծոյ[3002]։ 24 Քանզի ամենայն մարմին իբրեւ զխո՛տ է. եւ ամենայն փառք մարդոյ իբրեւ զծաղի՛կ խոտոյ. խոտն ցամաքեցաւ՝ եւ ծաղիկն թօթափեցաւ[3003]. 25 եւ բան Տեառն մնա՛յ յաւիտեան. ա՛յսինքն է՝ բա՛նն որ ՚ի ձե՛զ աւետարանեցաւ[3004]։

2
Գլուխ Բ

Գ գա 1 ՚Ի բաց թօթափել այսուհետեւ զամենայն չարութի՛ւն եւ զամենայն նենգութիւն, եւ զկեղծաւորութիւնս, եւ զնախանձ, եւ զամենայն չարախօսութիւն[3005]. 2 իբրեւ զարդի՛ ծնեալ մանկունս խօսունս, եւ անխարդա՛խ կաթինն փափաքիցէք. զի նովա՛ւ աճիցէք ՚ի փրկութիւն[3006]. 3 եթէ ճաշակեցէք՝ զի քաղցր է Տէր[3007]։ 4 Առ որ մատուցեա՛լ էք ՚ի Վէմն կենդանի, որ թէպէտ ՚ի մարդկանէ անարգեալ, այլ առ ՚ի յԱստուծոյ ընտրեալ եւ պատուակա՛ն է[3008]. 5 եւ դուք իբրեւ զվէմս կենդանիս շինի՛ք տաճար հոգեւոր՝ յանարատ քահանայութիւն, մատուցանել զհոգեւո՛րն պատարագս՝ հաճոյ Աստուծոյ, ՚ի ձեռն Յիսուսի Քրիստոսի[3009]։ 6 Քանզի կայ իսկ ՚ի գրի եթէ. Ահաւասիկ դնեմ ՚ի Սիոն վէ՛մ ընտիր, գլուխ անկեան պատուակա՛ն, եւ որ ՚ի նա հաւատասցէ՝ մի՛ ամաչեսցէ։ 7 Ձեզ այսուհետեւ հաւատացելոցդ՝ վէմ պատուակա՛ն. իսկ անհաւատիցն, վէ՛մն զոր անարգեցին շինօղքն. նա եղեւ գլուխ անկեան[3010]. 8 եւ վէմ գլորմա՛ն եւ վէմ գայթագղութեան, որ գայթագղին ապստամբեա՛լք ՚ի բանէն՝ յոր եւ եդան[3011]։ 9 Այլ դուք ազգ էք ընտի՛րք, թագաւորութիւն, քահանայութիւն. ազգ սո՛ւրբ. ժողովուրդ սեպհական. որպէս զի զձեր առաքինութիւնսն նուիրիցէ՛ք այնմ, որ զձեզ ՚ի խաւարէն կոչեաց յիւր սքանչելի՛ լոյսն[3012]։ 10 Որք երբեմն չժողովուրդ, բայց արդ ժողովո՛ւրդ Աստուծոյ. որք չողորմեալք, այժմ ողորմութի՛ւն գտէք։ 11 Սի՛րելիք՝ աղաչեմ, իբրեւ զպանդուխտս եւ զնժդեհս ՚ի բա՛ց մերժել ՚ի մարմնաւոր ցանկութեանցն, որ զինուորի՛ն ընդդէմ ոգւոց[3013]. 12 զվարս ձեր ՚ի մէջ հեթանոսաց պարկեշտս ցուցանել. զի որով բամբասիցեն զձեզ իբրեւ զչարագործս, ՚ի բարւոք գործոցն ձերոց դիտեալ՝ փառաւո՛ր առնիցեն զԱստուած յաւուրն այցելութեան[3014]։

Դ գբ 13 Հնազա՛նդ լերուք ամենայն մարդկեղէն ստեղծուածոյ վասն Տեառն. եթէ թագաւորի՝ իբրեւ առաւե՛լ ումեք[3015], 14 եթէ դատաւորաց՝ իբրեւ ՚ի նմանէ առաքելոց ՚ի վրէժխնդրութիւն չարագործացն, եւ ՚ի գովութիւն բարեգործացն[3016]։ 15 Զի այսպէս են կամք Աստուծոյ. բարեգործացն պապանձեցուցանե՛լ զանզգամ մարդոց զանգիտութիւն[3017]։ 16 Իբրեւ զազատս լինել, եւ մի՛ իբրեւ պատրուակ չարութեան ունել զազատութիւնն, այլ իբրեւ Աստուծոյ ծառայք։ 17 Զամենեսեան պատուեցէ՛ք. զեղբայրսիրութիւն սիրեցէ՛ք. յԱստուծոյ երկերո՛ւք. զթագաւորս պատուեցէ՛ք։ 18 Ծառայք հնազա՛նդ լինել յամենայնի երկիւղիւ տերանց, ո՛չ միայն բարերարացն եւ հեզոցն, այլ եւ կամակորա՛ցն[3018]։ 19 Զի եւ այս ճշմարիտ շնո՛րհք յԱստուծոյ են, եթէ բարւոք ինչ մտօք տանիցի՛ ոք վշտաց յանիրաւի[3019]։ 20 Քանզի զի՞նչ երախտիք իցեն, եթէ յորժամ մեղանչիցէք՝ տանջիցիք եւ համբերիցէք. այլ եթէ զբարիս գործիցէք՝ չարչարիցիք՝ եւ համբերիցէք, այն շնորհք յԱստուծո՛յ են[3020]. 21 քանզի ՚ի դոյնս իսկ կոչեցարուք։ Զի եւ Քրիստոս վասն ձեր մեռաւ, եւ ձեզ եթող օրինա՛կ՝ զի զհետ երթայցէք հետոց նորա[3021]։ 22 Որ ո՛չն արար մեղս, եւ ո՛չ գտաւ նենգութիւն ՚ի բերան նորա. 23 որ բամբասեալ՝ եւ ո՛չ փոխարէն բամբասէր. չարչարեալ՝ եւ ո՛չ պահէր սպառնալիս. բայց իրաւա՛մբք մատնէր դատաւորին[3022]. 24 որ զմեր մեղսն իւրով մարմնովն վերացո՛յց ՚ի խաչափայտն. զի լիցուք զերծեա՛լք ՚ի մեղաց անտի, եւ իցեմք արդարութեանն կենակիցք. որոյ վիրօքն բժշկեցա՛ք[3023]։ 25 Քանզի էիք իբրեւ զոչխարս մոլորեալս. այլ այժմ դարձարո՛ւք առ Հովիւն եւ Տեսուչ ոգւոց ձերոց։

3
Գլուխ Գ

գգ 1 Սոյնպէս եւ կանայք հնազա՛նդ լինել արանց իւրեանց. զի եթէ իցեն նոքա ապստա՛մբք ՚ի բանէ անտի, յաղագս կանանց գնացից, եւ առանց բանին իսկ շահեսցին[3024], 2 դիտե՛լ երկիւղիւ զձեր պարկեշտ գնացս[3025]։ 3 Որոց լինիցի՛ ո՛չ արտաքուստ հիւսիւք եւ ոսկեհո՛ւռ ծամակալօք՝ կամ պաճուճեալ զգեստուք զարդ[3026]. 4 այլ ծածո՛ւկ սրտին մարդն. անեղծութեամբ հնազանդութեան եւ հանդարտութեան հոգւոյն, որ է առաջի Աստուծոյ բազմապատիկ[3027]։ 5 Քանզի ա՛յսպէս երբեմն եւ կանայք որ յուսացեալ էին յԱստուած, զարդարէին զանձինս հնազանդե՛լ իւրեանց արանց[3028]։ 6 Որպէս եւ Սարրայ՝ զի հնազա՛նդ էր Աբրահամու. եւ տէ՛ր իւր կոչէր զնա. որոյ եղերուքն դուք որդի՛ք. բարեգո՛րծք էին, եւ ո՛չ կասկածէին՝ եւ ո՛չ ՚ի միոջէ ինչ երկիւղէ[3029]։ 7 Սոյնպէս եւ արք իմաստութեա՛մբ բնակեսցեն ընդ նոսա. իբրեւ տկա՛ր անօթոյ առնիցեն պատիւ կանանց՝ եւ իբրեւ ժառանգակցա՛ց շնորհացն կենաց. զի մի՛ խափան լիցին աղօթիցն ձերոց[3030]։ 8 Եւ գլուխ ամենայնի, զի համամի՛տք իցէք, համակարի՛ք, եղբայրասէ՛րք, ազնուագո՛ւթք, խոնա՛րհք[3031]։ 9 Մի՛ չար փոխանակ չարի հատուցանել, կամ բամբասանս ընդ բամբասանաց. այլ զնորին հակառակն՝ օրհնե՛լ, զի յա՛յս իսկ կոչեցարուք՝ զի զօրհնութիւնն ժառանգիցէք[3032]։ գդ 10 Զի որ կամի զկեանս սիրել, եւ զաւուրս իւր տեսանել ՚ի բարութեան, լռեցուսցէ՛ զլեզու իւր ՚ի չարութենէ, եւ զշրթունս իւր ՚ի չխօսելո՛յ զնենգութիւն[3033]. 11 խոտորեսցի՛ ՚ի չարէ, եւ արասցէ զբարի՛. խնդրեսցէ՛ զխաղաղութիւն, եւ երթիցէ՛ զհետ նորա[3034]։ 12 Զի աչք Տեառն ՚ի վերայ արդարոց, եւ ականջք նորա յաղօթս նոցա. երե՛սք Տեառն ՚ի վերայ չարագործաց։ 13 Եւ ո՞ իցէ որ չարչարիցէ զձեզ, եթէ դուք բարւոյն նախանձաւորք լինիցիք[3035]։ 14 Այլ թէ եւ չարչարիցիք եւս վասն արդարութեան, երանելի՛ էք. բայց յերկիւղէ նոցա մի՛ երկնչիցիք, եւ մի՛ խռովեսջիք[3036]։ 15 Այլ զՏէր զնոյն եւ զՔրիստոս՝ սո՛ւրբ ունիջիք ՚ի սիրտս ձեր։ Պատրա՛ստք իցէք տալ պատասխանի ամենայնի որ խնդրիցէ զբա՛նն՝ որ է վասն յուսոյն ձերոյ[3037]. 16 այլ հեզութեամբ եւ երկիւղիւ ունիցի՛ք բարս քաղցո՛ւնս. զի որով չարախօսիցեն զձէնջ՝ յամօ՛թ լիցին, որք բամբասեն զձեր բարւոք գնացս ՚ի Քրիստոս[3038]։ 17 Զի լա՛ւ է բարեգործաց, եթէ կամիցին ըստ Աստուծոյ կամացն չարչարել՝ քան չարագործացն[3039]. 18 զի եւ Քրիստոս մի անգամ վասն մեղաց ՚ի վերայ ձե՛ր մեռաւ, արդարն ՚ի վերայ անարդարոց. զի զձեզ մերձեցուսցէ՛ առ Աստուած. զի թէպէտ եւ մեռաւ մարմնով, այլ կենդանի՛ է հոգւով[3040]։ 19 Որով եւ ոգւոցն որ էին ՚ի բանտին, երթեալ քարոզեա՛ց[3041], 20 երբեմն ապստամբելոցն, յորժամ ներէ՛ր նոցա Աստուծոյ երկայնմտութիւնն յաւուրս Նոյի յորս տապանն կազմէր. յորս նուազունք՝ ա՛յս ինքն՝ ոգիք իբրեւ ո՛ւթ ապրեցան ՚ի ջրոյն[3042]։ 21 Որ եւ զձե՛զ ըստ նմին օրինակի, կեցուսցէ մկրտութիւնն. ոչ զմարմնոյ աղտն ՚ի բաց ընկենլով, այլ զբարւո՛ք մտաց հանդէս առ Աստուած, ՚ի ձեռն յարութեանն Յիսուսի Քրիստոսի[3043]. 22 որ է՛ ընդ աջմէ Աստուծոյ երթեա՛լ յերկինս, ՚ի հնազանդել նմա հրեշտակաց եւ իշխանութեանց եւ զօրութեանց[3044]։

4
Գլուխ Դ

Ե գե 1 Քրիստոսի չարչարե՛լն մարմնով վասն մեր, եւ դուք ՚ի նո՛յն միտս վառեցարո՛ւք. զի որ չարչարի՛ մարմնով՝ դադարէ ՚ի մեղաց[3045]. 2 զի մի՛ եւս ըստ մարդկան ցանկութեանց՝ այլ ըստ կամացն Աստուծոյ կեցցէ զա՛յլ եւս ժամանակն[3046]։ 3 Քանզի բաւակա՛ն է անցեալ ժամանակն լինելոյ կամացն հեթանոսաց, որք գնացին գիջութեամբք, ցանկութեամբք, գինեհարութեամբք, անառակութեամբք, արբեցութեամբք, անօրէ՛ն կռապաշտութեամբք[3047]։ 4 Որով օտարացեալք՝ ո՛չ ընդ ձեզ վարին. ՚ի նոյն անկարգութեան զեղխութիւն, եւ հայհոյեն[3048]։ 5 Որ տացեն պատասխանի՛ այնմ որ ՚ի պատրաստին ունի դատել զկենդանի՛ս եւ զմեռեալս[3049]։ 6 Զի ՚ի սոյն իսկ եւ մեռելոց խոստացեալ է, զի դատեսցին ըստ մարդկան մարմնով, եւ կենդանի՛ լիցին ըստ Աստուծոյ հոգւով[3050]։ 7 Ամենեցուն վախճան մերձեալ է. զգաստացարո՛ւք այսուհետեւ՝ եւ լերո՛ւք զուարթո՛ւնք յաղօթս[3051]։ 8 Նա՛խ քան զամենայն սէր սե՛րտ ունել ընդ միմեանս. զի սէր՝ ծածկէ՛ զբազմութիւն մեղաց։ 9 Օտարասէ՛րք լինել՝ ընդ միմեանս առանց տրտնջելո՛յ։ 10 Իւրաքանչիւրոք որպէս եւ ընկալաւ շնորհս ինչ՝ ՚ի միմեա՛նս զնոյն մատակարարել, իբրեւ զբարւոք հազարապետս պէսպէ՛ս շնորհացն Աստուծոյ[3052]։ 11 Եթէ ոք խօսիցի՝ իբրեւ զԱստուծոյ պատգամս. եթէ ոք մատակարարիցէ՛ իբրեւ ՚ի զօրութենէ զոր շնորհէ Աստուած. զի յամենայնի՛ փառաւորեսցի Աստուած ՚ի ձեռն Յիսուսի Քրիստոսի, որում փա՛ռք եւ զօրութիւն յաւիտեանս ամէն[3053]։

Զ գզ 12 Սիրելիք՝ մի՛ օտարոտի համարել զեռանդն ինչ որ ՚ի փորձութիւն ձեզ լինիցի, որպէս թէ օտա՛ր ինչ իրք ձեզ դիպիցին[3054]. 13 այլ իբրեւ հաղորդեալք Քրիստոսի չարչարանացն՝ ուրա՛խ լինիջիք, զի եւ ՚ի յայտնութեան փառաց նորա ցնծացեալ բերկրեսջիք[3055]։ 14 Իսկ եթէ նախատիցի՛ք եւս վասն անուանն Քրիստոսի, երանելի՛ էք. զի փառացն՝ եւ զօրութեան անուն, եւ Աստուծոյ Հոգին ՚ի վերայ ձեր հանգուցեալ է[3056]։ 15 Մի՛ ոք ՚ի ձէնջ չարչարեսցի իբրեւ զսպանօղ, կամ իբրեւ զգո՛ղ, կամ իբրեւ զչարագո՛րծ, կամ իբրեւ զօտարատեսո՛ւչ։ 16 Ապա թէ իբրեւ զքրիստոնեայ, մի՛ ամաչեսցէ. այլ փառաւո՛ր առնիցէ զԱստուած անուամբս այսուիկ[3057]։ 17 Զի ժամանա՛կ է սկիզբն լինելոյ դատաստանին ՚ի տանէն Աստուծոյ. զի եթէ նախ ՚ի մէնջ. իսկ զի՞նչ կատարած իցէ այնոցիկ, որ ո՛չ հաւանեցան Աստուծոյ աւետարանին[3058]։ 18 Եւ եթէ արդարն հազի՛ւ կեցցէ, իսկ ամպարիշտն եւ մեղաւորն ո՞ւր գտանիցի[3059]։ 19 Որպէս զի որ չարչարիցին ըստ Աստուծոյ կամացն, հաւատարիմ Հաստչին աւանդեսցեն զիւրեանց ոգիս բարերարութեամբք[3060]։

5
Գլուխ Ե

Է գէ 1 Զերիցունս այսուհետեւ աղաչեմ՝ իբրեւ զերիցակից՝ եւ վկա՛յ չարչարանացն Քրիստոսի, որ եւ հանդերձեալ փառացն յայտնելոյ հաղո՛րդ[3061]. 2 արածեցէ՛ք որ ՚ի ձեզ հօտդ է Աստուծոյ. վերակացու լինել՝ մի՛ իբրեւ ակամայ՝ այլ կամա՛ւ ըստ Աստուծոյ. մի՛ զաւշաքաղութեամբ, այլ յօժարութեամբ[3062]. 3 մի՛ իբրեւ տիրելով վիճակացն, այլ լինել օրինա՛կ հօտին[3063]. 4 զի յերեւել Հովուապետին՝ ընդունիջի՛ք զանթառամ փառաց պսակն[3064]։ 5 Սոյնպէս եւ երիտասարդք՝ հնազա՛նդ լերուք ծերոց. ամենեքին ընդ միմեանս՝ զխոնարհութի՛ւն ունիցի՛ն. զի Աստուած ամբարտաւանից հակառակ կայ, տայ շնո՛րհս խոնարհաց[3065]։ 6 Խոնարհեցարո՛ւք ընդ հզօր ձեռամբն Աստուծոյ. զի զձեզ բարձրացուսցէ՛ ՚ի ժամանակի։ 7 Զամենայն հոգս ձեր ընկեցէ՛ք ՚ի նա, զի նա՛ է որ հոգայ վասն ձեր։

Ը դա 8 Արթո՛ւն լերուք՝ հսկեցէ՛ք, զի ոսոխն ձեր Սատանայ իբրեւ զառեւծ գոչէ, շրջի եւ խնդրէ՝ թէ զո՛վ կլանիցէ[3066]։ 9 Որում ՚ի դիմի՛ հարկանիցիք հաստատեալք հաւատովք. գիտասջի՛ք զնոյն անցս չարչարանաց եղբայրութեան ձերոյ յաշխարհի յանձին կատարեալ[3067]։ 10 Եւ Աստուած ամենայն շնորհաց, որ կոչեաց զձեզ յիւր ՚ի յաւիտենական ՚ի փառսն Քրիստոսիւ Յիսուսիւ, որում փոքր մի եղերուք չարչարակիցք, նա՛ կազդուրեցուսցէ, կարողացուսցէ, հաստահի՛մն արասցէ[3068]։ 11 Նմա իշխանութիւն եւ փա՛ռք յաւիտեանս[3069]։ 12 ՚Ի ձեռն Սեղուիանոսի՛ հաւատարիմ եղբօր, որպէս կարծեմ՝ փոքր ՚ի շատէ գրեցի ձեզ, մխիթարել, եւ ՚ի վերայ սորին վկայե՛լ. զի եւ այս ճշմարիտ շնո՛րհք յԱստուծոյ են՝ յոր հաստատեալ կայցէք[3070]։ 13 Ողջո՛յն տայ ձեզ որ ՚ի Բաբելոն ընտրելակիցն եկեղեցի է. եւ Մարկոս որդի իմ[3071]։ 14 Ողջոյն տաջիք միմեանց ՚ի համբոյր սրբութեան։ Խաղաղութի՛ւն ընդ ձեզ ամենեսեան, որ էք ՚ի Քրիստոս Յիսուս. ամէն[3072]։

Տունք մլզ̃[3073]։