ԹՈՒՂԹ ԿՈՐՆԹԱՑՒՈՑՆ ԱՌ ՍՈՒՐԲ ԱՌԱՔԵԱԼՆ ՊԱՒՂՈՍ[5479][5480]

1 Ստեփանոս և որք ընդ նմա երիցունք, դաբնոս եւ բուլոս, թէոփիլոս և քսինոն, առ պաւղոս հայր մեր և աւետարանիչ, և հաւատարիմ վարդապետ ’ի Քրիստոս Յիսուս, ողջոյն[5481]։ 2 Արք ոմանք երկու եկին ’ի կորնթոս, սիմոն անուն և կղէոբոս, որք կործանեցին քաջ քաջ զոմանց հաւատս, հրապուրօղս, և ապականեալ բանիւք[5482]։ 3 Յորոց բանից վերայ դու ինքնին պարտիս հասանել. 4 զի մեք ’ի քէն ոչ երբէք լուաք զայնպիսի բանս, և ոչ յայլոցն առաքելոց[5483]. 5 այլ այսչափ գիտեմք որ ինչ ’ի քէն լուաք, և որ ինչ ’ի նոցանէն լուաք հաստատուն պահեմք[5484]։ 6 Բայց յայսմիկ յոյժ ողորմեցաւ Տէր, զի մինչ դու իսկ մարմնով ընդ մեզ ես, միւսանգամ լուիցիք[5485]։ 7 Արդ՝ կամ գրեա դու առ մեզ. և կամ ինքնին դու առ մեզ վաղվաղակի եկեսջիր[5486]. 8 մէք հաւատամք ’ի Տէր՝ թէ որպէս յայտնութիւն ցուցաւ թէովնեայ, եթէ փրկեաց զքեզ Տէր ’ի ձեռաց անօրինին[5487]։ 9 Եւ են բանք մոլորութեան պղծոցն. զոր ասենն և ուսուցանենն, այսպէս[5488]. 10 Չէ պարտ ասեն զմարգարէսն ընդունել[5489] 11 և ոչ Աստուած ասեն ամենակալ. և ոչ ասեն յարութիւն մարմնոց մեռելոց[5490]. 12 և ոչ զմարդն ասեն բնաւ ստեղծեալ յԱստուծոյ[5491]. 13 և ոչ ի կուսէն Մարիամայ ծնեալ առնեն զՅիսուս Քրիստոս մարմնովն[5492]. 14 և ոչ զաշխարհս արարած առնեն Աստուծոյ, այլ հրեշտակի ուրումն[5493]։ 15 Արդ՝ փոյթ յանձին կալջիր հասանել առ մեզ[5494]. 16 զի առանց գայթակղութեան կայցէ քաղաքս կորնթացւոց[5495]. 17 և նոցա յիմարութիւն յայտ[5496] 18 յանդիմանութեամբ ամենեցուն խայտառակեալ մերժեսցին։ Ո՛ղջ լեր[5497]։

19 Առին, տարան զթուղթն սարկաւագք ’ի քաղաքն փիլիպեսւոս թերեպտոս և տիքոս. զի իբրև առ զայն թուղթն պաւղոս՝ թէպէտ և ինքն ’ի կապանս էր վասն ստատոնիկեայ ապոփոլանի կնոջ, իբրև մոռանալ նմա զկապանս, և սուգ առնուլ նմա վասն բանիցին զոր լուաւ։ և ասէ լալով, իբրև թէ լաւ էր ինձ եթէ վախճանեալ էի՝ և ընդ Տեառն էի, քան թե աստէն նովին մարմնով, և զայսպիսի բանս և զաղէտս լսեմ զսուտ վարդապետութեան, զի տրտմութիւն ’ի տրտմութեան վերայ հասանի աւադիկ։ Եւ յայդչափ տարակուսանաց վերայ կալ ’ի կապանս, և տեսանել զայդ աղէտ տարակոյս, առ որս ընթացեալ սատանայի և մենքենայից նորա, գործել հնարի զչարիս։ Եւ այսպէս բազում՝ չարչարանօք առնէր պաւղոս թղթոյն պատասխանի[5498]։

1[5499] Պաւղոս կալանաւոր Յիսուսի Քրիստոսի առ եղբարս կորնթացիս, ’ի բազում վրիպակէ աստի ողջոյն[5500]։ 2 Ես ոչինչ կարի զարմացեալ եմ՝ եթէ այդչափ վաղվաղակի ընթանան հրապոյրք չարին[5501]։ 3 Այլ զի Տէր Յիսուս վաղվաղակի արասցէ զգալուստն իւր վասն այնորիկ՝ որ փոփոխէն և անարգեն զհրամանս նորա[5502]։ 4 Այլ ես իսկզբանէ զայն ուսուցի ձեզ, որ ես ինքնին ընկալայ յառաջնոց առաքելոցն, որ զամենայն ժամանակս ընդ Տեառն մերոյ Յիսուսի Քրիստոսի շրջէին[5503]։ 5 Եւ արդ՝ ասեմ, զի Տէր Յիսուս Քրստոս ’ի մարիամայ կուսէ ծնաւ, որ էր ’ի զաւակէն դաւթի[5504], 6 ըստ աւետեաց հոգւոյն սրբոյ, առ ’ի հօրէ ’ի յերկնից առաքելոյ ’ի նմա[5505]. 7 զի յաշխարս մխեսցի Յիսուս, և ազատեսցէ զամենայն մարմին իւրով մարմնովն. զի զմեզ ’ի մեռելոց յարուսցէ. որպէս եցոյց զանձն օրինակ[5506]։ 8 Եւ զի յայտ լիցի զի մարդն ’ի հօրէ ստեղծաւ[5507]. 9 վասն այնորիկ մարդն ’ի կորստեանն իւրում անխնդիր ոչ մնաց[5508], 10 այլ խնդրեցաւ, զի ’ի ձեռն որդեգրութեան կենդանասցի[5509]։ 11 Քանզի Աստուած, որ ամենայնի Տէրն է, հայր Տեառն մերոյ Յիսուսի Քրիստոսի[5510]. 12 որ արար զերկինս և զերկիր, առաքեաց նախ ’ի հրեայսն զմարգարէսն[5511]. 13 զի ’ի մեղաց անտի նոցա զնոսա կորզեսցէ, և հանցէ յարդարութիւն իւր[5512]։ 14 Զի կամէր նա փրկել զտունն Իսրայէլի, բաշխեաց արկ նա յոգւոյ անտի ’ի վերա մարգարէիցն[5513]. 15 որ զանմոլարն աստուածպաշտութիւն և զծնունդն Քրիստոսի քարոզեսցեն ժամանակօք բազմօք։ 16 Իսկ որ անօրէն իշխանն էր իբրև աստուածանալ կամեցաւ, ձեռն արկանէր ’ի նոսա. 17 և զամենայն մարդիկ մեղօք կապէր[5514]. 18 քանզի և դատաստանք աշխարհի մերձեալ էին։ 19 Աստուած ամենակալ իբրև արդարացուցանել կամեցաւ, և ոչ կամեցաւ խոտել զիւր ստեղծուածն[5515], 20 իբրև ետես չարչարեալ. Ողորմեցաւ. 21 և առաքեաց ’ի վախճան ժամանակաց զհոգին սուրբ ’ի կոյսն, յառաջագոյն նկատեալ մարգարէիւք[5516]։ 22 Որ իբրև սրտի մտօք հաւատաց, եղև արժանի յղանալ և ծնանել զՏէր մեր Յիսուս Քրիստոս[5517]։ 23 Զի կորստական մարմնովն, որով հպարտացեալ յարգի լինէր չարն, նովին մարմնովն կշտամբեալ յանդիմանեսցի[5518], 24 թէ չէր իսկ Աստուած։ Զի ’ի մարմին անդր յիւր Յիսուս Քրիստոս կոչեաց և փրկեաց զկորստական մարմինն. և ձգեաց զնոսա ’ի կեանսն յաւիտենից ’ի ձեռն հաւատոցն[5519]։ 25 Զի արդարութեան տաճար սուրբ յիւր մարմին անդր լինելոց ժամանակացն պատրաստեսցէ[5520]. 26 յոր և մեքն իբրև հաւատացաք, ազատեցաք[5521]։ 27 Ապա դիտասջիք եթէ ոչ են նոքա որդիք արդարութեան, այլ բարկութեան[5522]. 28 զի զողորմութիւնն Աստուծոյ կարճեն այնձանց իւրեանց[5523], 29 և ասեն եթէ ոչ են երկինք և երկիր և ամենայն արարածք՝ ձեռագործք հօրն ամենայնի[5524]։ 30 Այլ նոքա անիծեալքն զօձին ուսումն ունին[5525]. 31 բայց դուք՝ զօրութեամբն Աստուծոյ ’ի բաց մերժեցարուք ’ի նոցանէ. և զխոտոր վարդապետութիւն նոցա ’ի ձէնջ ’ի բաց հալածեցէք[5526]։ 32 Զի ոչ էք դուք որդիք անհնազանդութեան, այլ մանկունք սիրեցելոյն եկեղեցւոյ[5527]. 33 վասն որոյ ժամանակ յարութեան քարոզեցաւ ընդ ամենեսեան[5528]։ 34 Բայց որ ասեն՝ չիք յարութիւն մարմնոյ. նոքա իսկ չեն յառնելոց ’ի կեանսն յաւիտենից, այլ ’ի դատապարտութիւն[5529]։ 35 Զի ’ի դատաստան յարիցեն թերահաւատ մարմնով[5530]. 36 զի զմարմինն զոր ասէն թէ չիք յարութիւն. նոցա մի լիցի յարութիւն. զի այնպիսիքն ի յարութենէն ուրացեալք գտանին[5531]։ 37 Նաև դուք արք կորնթացիք գիտէք զցորենոյդ սերմանէ, և զայլոց սերմանաց[5532]. 38 զի հատ լոկ մերկ անկանի յերկիր. և անդ ’ի խոնարհ նախ մեռանի[5533]. 39 և ապա յառնէ կամօքն Տեառն զնոյն մարմին՝ զգեցեալ[5534]. 40 և ո՛չ եթէ լոկ մարմին մէկին յառնէ. այլ բազմապատիկ տոհմականօք կանգնեալ օրհնի[5535]։ 41 Այլ մեզ պարտ էր ոչ միայն ’ի սերմանաց անտի առակս ’ի մէջ բերել, այլ ’ի պատուական մարմնոց մարդկանէ[5536]։ 42 Դուք ինքնին գիտէք զյովնան որդի մատթեայ[5537]. 43 վասն զի յամառեաց նա ’ի քարոզելն նինուեացւոց, ընկեցաւ ’ի պորտ ձկանն զերիս տիւս և զերիս գիշերս[5538]։ 44 յետ երից աւուրց լուաւ աղօթից նորա Աստուած, և ած ’ի վեր ’ի ներքին անդնդոց անտի[5539]. 45 և ոչինչ ապականեցաւ մարմինն նորա, և ոչ արտևան մի կորացաւ[5540]. 46 որչափ ևս առաւել վասն ձեր թերահաւատք։ 47 Եթէ հաւատասջիք դուք ’ի Տէր Յիսուս Քրիստոս, յարուսցէ զձեզ որպէս ինքն յարեաւ[5541]։ 48 Զի եթէ ոսկերքն եղիշէի մարգարէի ’ի վերա մեռելոյն անկեալ յարուցին զմեռեալն[5542]. 49 դուք ո՞րչափ ևս առաւել, որ ’ի մարմին և յարիւն և ’ի հոգին Քրիստոսի յեցեալ էք, յայնմ աւուր յարիջիք ողջանդամք մարմնով[5543]։ 50 Իսկ Եղիա մարգարէ զորդի այրւոյն գիրկս արկ և յարոյց ’ի մեռելոց[5544]. 51 որչափ ևս առաւել Յիսուս Քրիստոս և զձեզ յարուսցէ յաւուրն յայնմիկ, որպէս և ինքն իսկ յարեաւ ’ի մեռելոց ողջանդամ մարմնով։ 52 Ապա թէ այլ ինչ տարապարտուց ընդունիք[5545], 53 աշխատ ոք յայսմ հետէ զիս մի արասցէ. զի ես զկապանս զայս յանձին իմում կրեմ[5546], 54 զի զՔրիստոս շահեցայց. և կտտանաց մարմնոյս այսմիկ համբերեմ, զի յարութեան մեռելոցն արժանի եղէց[5547]։ 55 Եւ դուք իւրաքանչիւրոք որպէս ընկալարուք զօրէնսն ’ի ձեռաց երանելի մարգարէիցն, և սրբոյ աւետարանին՝ հաստատուն կալջիք[5548]։ 56 և վարձս ընկալջիք ’ի յարութեան մեռելոց, զկեանսն յաւիտենից ժառանգեսջիք։ 57 Ապա եթէ թերահաւատ ոք լինիցի և յանցանիցէ, դատաստան անձին իւրում նիւթէ ընդ չարագործսն, և ընդ այնոսիկ որ զայնպիսի առաջարկութիւն մոլորութեան մարդկան ունին, պատժին։ 58 Զի նոքա ինքնին իսկ են ծնունդք իժից և կորիւնք օձից և քարբից։ 59 Մերժեցարուք և ’ի բաց մեկնեցարուք ’ի նոցանէ զօրութեամբ Տեառն մերոյ Յիսուսի Քրիստոսի[5549]։ 60 Եւ եղիցի ընդ ձեզ խաղաղութիւն և շնորհք անդրանկին սիրելւոյ. Ամէն[5550]։