ԱՌ ԵՓԵՍԱՑԻՍ ԹՈՒՂԹ[4289]

1
Գլուխ Ա

ըկ 1 Պաւղոս առաքեալ Յիսուսի Քրիստոսի կամօ՛քն Աստուծոյ, սրբոց որ են յԵփեսոս, եւ հաւատացելոց ՚ի Քրիստոս[4290]։ 2 Շնո՛րհք ընդ ձեզ եւ խաղաղութի՛ւն յԱստուծոյ Հօրէ մերմէ եւ ՚ի Տեառնէ Յիսուսէ Քրիստոսէ։

Ա 3 Օրհնեա՛լ է Աստուած եւ Հայր Տեառն մերոյ Յիսուսի Քրիստոսի. որ օրհնեա՛ց զմեզ ամենայն հոգեւոր օրհնութեամբ յերկնաւորս ՚ի Քրիստոս. 4 որպէս ընտրեա՛ց զմեզ նովաւ յառա՛ջ քան զլինելն աշխարհի, լինել մեզ սո՛ւրբս եւ անարա՛տս առաջի նորա՝ սիրով[4291]։ 5 Յառաջագո՛յն սահմանեաց զմեզ յորդեգրութիւն ՚ի ձե՛ռն Յիսուսի Քրիստոսի, ՚ի նո՛յն ըստ հաճութեա՛ն կամաց իւրոց, 6 ՚ի գովե՛ստ փառաց շնորհաց իւրոց. որով զուարճացո՛յց զմեզ Սիրելեաւն. 7 որով ունիմք զփրկութի՛ւն ՚ի ձեռն արեան նորա, զթողութիւն մեղաց ըստ մեծութեան շնորհաց իւրոց[4292]. 8 որ առաւելա՛ւ ՚ի մեզ ամենայն իմաստութեամբ եւ գիտութեամբ։ 9 Եցո՛յց մեզ զխորհուրդս կամաց իւրոց, ըստ հաճութեան իւրում. զոր յառաջագոյն եդ նովաւ[4293], 10 ՚ի տնտեսութիւն լրման ժամանակաց, բովանդակել զամենայն Քրիստոսի՛ւ որ ինչ յերկինս՝ եւ որ ինչ յերկրի, ՚ի նո՛յն[4294]։ 11 Որով եւ վիճակեցա՛ք յառաջագոյն հրաւիրեալք, ըստ յառաջադրութեանն Աստուծոյ. որ զամենայն յաջողէ ըստ խորհրդոց կամա՛ց իւրոց[4295]. 12 լինել մեզ ՚ի գովեստ փառա՛ց նորա՝ յառաջագոյն յուսացելոցս ՚ի Քրիստոս։ 13 Որով եւ դուք իբրեւ լուարուք զբանն ճշմարտութեան, զաւետարանն փրկութեան ձերոյ, որով հաւատացեալ կնքեցա՛յք Հոգւոյն Սրբոյ աւետեաց[4296]. 14 որ է առհաւատչեայ ժառանգութեան մերոյ ՚ի փրկութի՛ւն նուաճութեան, ՚ի գովեստս փառաց նորա[4297]։

Բ ըդ 15 Վասն այնորիկ եւ ես իբրեւ լուա՛յ զհաւատսն ձեր որ ՚ի Տէր Յիսուս, եւ զսէրն որ ընդ ամենայն սուրբս[4298], 16 ո՛չ դադարեմ ՚ի գոհանալոյ վասն ձեր՝ յիշել զձեզ յաղօթս[4299]. 17 զի Աստուած Տեառն մերոյ Յիսուսի Քրիստոսի, Հայրն փառաց՝ տացէ՛ ձեզ զհոգին իմաստութեան եւ յայտնութեան՝ գիտութեամբն իւրով[4300]. 18 լուսաւո՛ր առնել զաչս սրտից, առ ՚ի գիտելոյ մեզ՝ զի՞նչ է յոյս կոչման նորա, եւ զի՞նչ է մեծութիւն փառաց ժառանգութեանն նորա ՚ի սուրբս[4301]. 19 եւ զի՞նչ է առաւելութիւն մեծութեան զօրութեան նորա ՚ի մեզ հաւատացեալս, ըստ յաջողութեան կարողութեան զօրութեանն իւրոյ[4302], 20 զոր յաջողեաց ՚ի Քրիստոս։ Զի յարոյց զնա ՚ի մեռելոց. եւ նստոյց ընդ աջմէ իւրմէ յերկնաւորս, 21 ՚ի վերայ ամենայն իշխանութեան, եւ պետութեան, եւ զօրութեան, եւ տէրութեան, եւ ամենայն անուա՛ն անուանելոյ. ո՛չ միայն յաշխարհիս յայսմիկ, այլ եւ ՚ի հանդերձելո՛ւմն[4303]. 22 եւ զամենայն ինչ հնազանդ արար ՚ի ներքոյ ոտից նորա։ Եւ զնա՛ եդ գլո՛ւխ ՚ի վերայ ամենայն իրիք եկեղեցւոյ[4304], 23 որ է մարմին նորա, լրումն՝ որ զամենայն յամենայնի լնու։

2
Գլուխ Բ

Գ 1 Եւ դուք որ մեռեալն էիք ՚ի մեղս ձեր եւ յանցանս[4305], 2 յորս երբեմն գնայիք ըստ յաւիտենի՛ աշխարհիս այսորիկ, ըստ իշխանին իշխանութեան օդո՛յս այսոյ, որ ա՛յժմս ընդմտեա՛լ է յորդի՛սն ապստամբութեան[4306]. 3 յորս եւ մեք ամենեքեան շրջեաք երբեմն, ՚ի ցանկութիւն մարմնոյ մերոյ, եւ առնեաք զկամս մարմնո՛յ եւ զմտաց, եւ էա՛ք արդարեւ որդի՛ք բարկութեան իբրեւ այլքն[4307]։ ըզ 4 Այլ Աստուած որ մեծն է ողորմութեամբ, վասն բազում սիրոյն իւրոյ զոր սիրեացն զմեզ[4308]. 5 մինչդեռ մեռեալն էաք ՚ի մեղս մեր, կենդանի՛ս արար զմեզ ՚ի Քրիստոս. քանզի շնորհօ՛ք ապրեցաք[4309]. 6 ընդ նմին յարոյց, եւ ընդ նմին նստո՛յց յերկնաւո՛րս ՚ի Քրիստոս Յիսուս։ 7 Զի ցուցցէ՛ ՚ի յաւիտեանսն որ գալոցն են՝ զառաւե՛լ մեծութիւն շնորհա՛ցն իւրոց՝ քաղցրութեամբ ՚ի մեզ ՚ի Քրիստոս Յիսուս[4310]։ 8 Զի շնորհօք նորա էք փրկեալք ՚ի ձեռն հաւատոցն. եւ այս՝ ո՛չ ՚ի ձէնջ, այլ Աստուծոյ պարգեւ է[4311]. 9 ո՛չ ՚ի գործոց, զի մի՛ ոք պարծեսցի[4312]։ 10 Զի նորա՛ արարած եմք, հաստատեալք Քրիստոսիւ Յիսուսիւ ՚ի գո՛րծս բարութեան. յորս յառաջագոյն պատրաստեաց Աստուած. զի ՚ի նո՛յն գնասցուք[4313]։ 11 Վասն որոյ եւ դուք յիշեցէք, զի երբեմն հեթանո՛սք էիք մարմնով. որ կոչեցեա՛լն են անթլփատութիւն՝ յանուանեալ թլփատութենէ անտի մարմնաւո՛ր ձեռագործին[4314]. 12 զի էիք ՚ի ժամանակին յայնմիկ առանց Քրիստոսի, եւ տարագի՛րք յուխտից աւետեացն, եւ յո՛յս ինչ ո՛չ ունէիք՝ եւ անաստուածք էիք յաշխարհի[4315]։ 13 Իսկ այժմ ՚ի ձեռն Յիսուսի Քրիստոսի, դուք՝ որ երբեմն հեռաւո՛րքն էիք, մերձաւո՛րք եղերուք արեա՛մբն Քրիստոսի[4316]։ 14 Զի նա՛ է խաղաղութիւն մեր, որ արար զերկոսեան մի. եւ զմիջնորմ ցանկոյն քակեա՛ց, զթշնամութիւն ՚ի մարմնի իւրում[4317]. 15 եւ զօրէնս պատուիրանացն՝ հրամանօ՛քն խափանեաց. զի զերկոսին հաստատեսցէ ինքեա՛մբ ՚ի մի նո՛ր մարդ, եւ արասցէ խաղաղութիւն[4318]. 16 եւ հաշտեցուսցէ՛ զերկոսին միով մարմնով ընդ Աստուծոյ խաչի՛ւն իւրով։ Քանզի սպան զթշնամութիւն յանձին իւրում[4319], 17 եւ եկն աւետարանեա՛ց խաղաղութիւն ձեզ հեռաւորաց, եւ խաղաղութիւն մերձաւորաց[4320]. 18 զի նովա՛ւ ունիմք զնուաճութիւն երկոքին միո՛վ Հոգւով առ Հայր։ 19 Ապա այսուհետեւ ո՛չ էք օտարք եւ պանդուխտք, այլ քաղաքակի՛ցք սրբոց, եւ ընտանի՛ք Աստուծոյ[4321]. 20 շինեալք ՚ի վերայ հիման առաքելոց եւ մարգարէից. որոյ է գլուխ անկեանն Յիսուս Քրիստոս[4322]. 21 յորում ամենայն շինուածն յօդեա՛լ եւ պատշաճեալ աճէ ՚ի տաճա՛ր սուրբ Տերամբ. 22 յորում եւ դո՛ւք ընդ նմին շինիք ՚ի բնակութիւն Աստուծոյ Հոգւով[4323]։ վջ

3
Գլուխ Գ

Դ 1 Վասն այսորիկ ես Պաւղոս կապեալ Յիսուսի Քրիստոսի, վասն ձեր հեթանոսաց. 2 թերեւս լուեա՛լ իցէ ձեր զտնտեսութիւն շնորհա՛ցն Աստուծոյ, որ տուեա՛լ են ինձ ՚ի ձեզ[4324]։ 3 Զի ըստ յայտնութեա՛ն ցուցաւ ինձ խորհուրդն. որպէս յառաջագոյն գրեցի առ ձեզ սակաւուք[4325]. 4 առ ՚ի կարօղ լինելո՛յ ընթեռնուլ եւ ՚ի միտ առնուլ՝ զիմաստութիւնն իմ ՚ի խորհրդեա՛նն Քրիստոսի[4326]։ 5 Զի այլոց ազգաց ո՛չ ցուցաւ որդւոց մարդկան. որպէս եւ այժմ յայտնեցաւ սրբոց իւրոց՝ առաքելոց եւ մարգարէից՝ Հոգւո՛վն[4327]. 6 լինել հեթանոսաց ժառանգակիցս՝ եւ մարմնակիցս, եւ հաղորդս աւետեացն ՚ի Քրիստոս Յիսուս՝ աւետարանաւն, 7 որոյ եղէ ես Պաւղոս սպասաւոր, ըստ պարգեւաց շնորհա՛ցն Աստուծոյ որ տուան ինձ, ըստ յաջողութեան զօրութեան նորա[4328]։ 8 Ինձ որ տրո՛ւպս եմ ամենայն սրբոց՝ տուան շնորհքս այս ՚ի հեթանոսս, աւետարանել զանքննի՛ն մեծութիւնն Քրիստոսի. 9 եւ լուսաւո՛ր առնել զամենեսին, թէ զի՞նչ է տնտեսութիւն խորհրդոյն, որ ծածկեա՛լ էր յամենայն յաւիտեանց՝ առ Աստուծոյ որ զամենայն ինչ արար[4329]։ 10 Զի յայտնեսցի՛ արդ իշխանութեա՛նց եւ պետութեանց՝ որ յերկինս են, ՚ի ձեռն եկեղեցւոյ՝ բազմապատի՛կ իմաստութիւնն Աստուծոյ[4330]. 11 ըստ յառաջադրութեան յաւիտեանցն՝ զոր արար ՚ի ձեռն Տեառն մերոյ Յիսուսի Քրիստոսի. 12 որով ունիմք զհամարձակութիւն եւ զնուաճութիւն յուսով ՚ի ձե՛ռն հաւատոց նորա. 13 վասն որոյ աղաչեմ մի՛ ձանձրանալ ՚ի նեղութեա՛նս մերում, որ վասն ձե՛ր է. որ է փա՛ռք մեր[4331]։

Ե 14 Վասն այսորիկ դնեմ ծունր առ Հայր Տեառն մերոյ Յիսուսի Քրիստոսի[4332]. 15 ուստի ամենայն նահապետութիւն յերկինս եւ յերկրի անուանի. 16 զի տացէ՛ ձեզ ըստ մեծութեան փառաց իւրոց, հաստատել զօրութեամբ ՚ի ձեռն Հոգւո՛յն իւրոյ, ՚ի ներքին մարդն[4333] 17 բնակել Քրիստոսի հաւատո՛վք ՚ի սիրտս ձեր. սիրո՛վ արմատացեալք, եւ հաստատեալք[4334]։ 18 Զի կարօղ լինիջիք հասանել ընդ ամենայն սուրբս, զի՛նչ է լայնութիւն եւ երկայնութիւն, եւ բարձրութիւն եւ խորութիւն[4335]. 19 ճանաչե՛լ զառաւելութիւն գիտութեան սիրո՛յն Քրիստոսի. զի լցջի՛ք ամենայն լրութեամբն Աստուծոյ[4336]։ 20 Այլ ա՛յնմ որ կարօղն է առաւել քան զամենայն ինչ առնել յաճախութեամբ, քան զոր խնդրե՛մքն եւ իմանամք. ըստ զօրութեանն որ յաջողեա՛լն է ՚ի մեզ. 21 նմա փառք յեկեղեցւոջն եւ ՚ի Քրիստոս Յիսուս, յամենա՛յն ազգս յաւիտենից յաւիտեանս. ա՛մէն[4337]։

4
Գլուխ Դ

Զ 1 Արդ՝ աղաչեմ զձեզ ես որ կապեալս եմ ՚ի Տէր, արժանի՛ գնալ կոչմանն յոր կոչեցարուք. 2 ամենայն խոնարհութեամբ, եւ հեզութեամբ, եւ երկայնմտութեամբ՝ անսա՛լ միմեանց սիրով[4338]. 3 փութալ պահել զմիաբանութիւն Հոգւոյն յօդիւ խաղաղութեան[4339]։ 4 Մի մարմին՝ եւ մի հոգի. որպէս եւ կոչեցարուք ՚ի մի յոյս կոչման ձերոյ։ 5 Մի է Տէր, մի հաւատք, մի մկրտութիւն[4340]. 6 մի Աստուած, եւ Հա՛յր ամենեցուն, որ ՚ի վերայ ամենայնի, եւ ընդ ամենեսին, եւ յամենեսին ՚ի մեզ[4341]։ 7 Այլ իւրաքանչի՛ւր ումեք ՚ի մէնջ տուեալ են շնո՛րհք ըստ չափոյ պարգեւացն Քրիստոսի[4342]։ 8 Վասն որոյ եւ ասէ. Ե՛լ ՚ի բարձունս՝ գերեաց զգերութիւն, եւ ետ պարգեւս մարդկան։ 9 Որ ելն զի՞նչ է, եթէ ոչ՝ զի էջ նախ ՚ի ստորին կողմ երկրի[4343]։ 10 Որ էջն, նո՛յն է՝ եւ որ ելն ՚ի վերոյ քան զամենայն երկինս, զի լցցէ՛ զամենայն։ 11 Եւ նա՛ ետ զոմանս առաքեալս, զոմանս մարգարէ՛ս, զոմանս աւետարանիչս, զոմանս հովիւս եւ վարդապետս. 12 ՚ի հաստատութիւն սրբոց, ՚ի գո՛րծ պաշտաման, ՚ի շինուա՛ծ մարմնոյն Քրիստոսի[4344]. 13 մինչեւ հասցուք ամենեքեան ՚ի մի միաբանութիւն հաւատոց՝ եւ գիտութեան Որդւոյն Աստուծոյ. յայր կատարեա՛լ ՚ի չափ հասակի կատարմանն Քրիստոսի[4345]։ 14 Զի մի՛ յայսմհետէ իցեմք տղա՛յք խռովեալք եւ տատանեալք յամենայն հողմոց վարդապետութեան, խաբէութեամբ մարդկան. խորամանգութեամբ ՚ի խաբէութիւն մոլորութեան[4346]. 15 այլ ճշմարտեալք սիրով՝ աճեցուսցուք ՚ի նա զամենայն, որ է գլո՛ւխ Քրիստոս[4347]. 16 ուստի ամենայն մարմինն յօդեալ եւ պատշաճեալ ամենայն խաղալեօք տարաբերութեան՝ ըստ ազդեցութեան՝ չափով ըստ իւրաքանչի՛ւր մասին՝ զաճո՛ւմն մարմնոյ գործէ՝ ՚ի շինած անձին իւրոյ սիրով[4348]։

Է 17 Արդ՝ զայս ասեմ եւ ուխտեմ ՚ի Տէր. մի՛ եւս ձեզ զնոյն օրինակ գնալ, որպէս եւ ա՛յլ հեթանոսք գնան՝ ունայնութեամբ մտաց իւրեանց. 18 որոց խաւարեա՛լ են սիրտք իւրեանց, եւ օտարացեա՛լ են ՚ի կենաց անտի Աստուծոյ, վասն տգիտութեանն որ է ՚ի նոսա, վասն կուրութեա՛ն սրտից իւրեանց[4349]։ 19 Որք զանձա՛նց իւրեանց զյոյսն հատին, եւ մատնեցի՛ն զանձինս գիջութեան, ՚ի գործս ամենայն պղծութեան ագահութեամբ[4350]։ 20 Այլ դուք՝ ո՛չ այսպէս ուսարուք զՔրիստոս. 21 թէպէտ եւ լուարուք զնմանէ՝ եւ նովաւ ուսա՛յք, որպէս է՛ ճշմարտութիւնն Յիսուսի. 22 ՚ի բա՛ց մերկանալ ՚ի ձէնջ ըստ առաջին գնացիցն զմարդն հին, զապականեալն ցանկութեամբք՝ խաբէութեանն. 23 եւ նորոգել Հոգւովն մտաց ձերոց[4351]. 24 եւ զգենուլ զնո՛ր մարդն՝ որ ըստ Աստուծոյն հաստատեա՛լ է, արդարութեամբ եւ սրբութեամբ ճշմարտութեանն։ 25 Վասն որոյ ՚ի բա՛ց ընկեցէք զստութիւն. խօսեցարո՛ւք զճշմարտութիւն իւրաքանչիւր ընդ ընկերի իւրում. զի եմք միմեանց անդամք[4352]։ 26 Բարկանայք՝ եւ մի՛ մեղանչէք. արեգակն ՚ի վերայ բարկութեան ձերոյ մի՛ մտցէ։ 27 Եւ մի՛ տայք տեղի Սատանայի։ 28 Որ գողանայրն, մի՛ եւս գողասցի, այլ մանաւանդ վաստակեսցէ՛ գործել ձեռօք իւրովք զբարիս. զի բաւակա՛ն իցէ տալ ում պիտո՛յ իցէ[4353]։ 29 Ամենա՛յն բան տգեղ ՚ի բերանոյ ձերմէ մի՛ ելցէ. այլ որ ինչ բարի՛ն է, ՚ի շինա՛ծ պիտոյից, զի տացէ շնո՛րհս այնոցիկ որ լսենն[4354]։ 30 Եւ մի՛ տրտմեցուցանէք զՀոգին Սուրբ Աստուծոյ, որով կնքեցարուք յաւուրն փրկութեան։ 31 Ամենայն դառնութիւն, եւ բարկութիւն, եւ սրտմտութիւն, եւ աղաղակ, եւ հայհոյութիւն՝ բարձցի՛ ՚ի ձէնջ ամենայն չարութեամբն հանդերձ[4355]։ 32 Լերո՛ւք ընդ միմեանս քաղցունք՝ գթա՛ծք. շնորհե՛լ միմեանց, որպէս եւ Աստուած Քրիստոսիւ շնորհեաց մեզ։

5
Գլուխ Ե

1 Նմանօ՛ղք եղերուք Աստուծոյ, իբրեւ որդիք սիրելիք[4356]. 2 եւ գնացէ՛ք սիրո՛վ՝ որպէս եւ Քրիստոս սիրեաց զմեզ, եւ մատնեաց զանձն իւր վասն մեր, պատարագ եւ զենումն Աստուծոյ ՚ի հոտ անուշից[4357]։

Ը 3 Այլ պոռնկութիւն եւ ամենայն պղծութիւն, կամ ագահութիւն, եւ անուանեսցի մի՛ ՚ի միջի ձերում, որպէս եւ վայելէ սրբոց[4358]. 4 եւ զազրութիւն, կամ խօ՛սք յիմարութեան, կամ խեղկատակութիւն, որ ո՛չ վայելէ. այլ մանաւանդ գոհութի՛ւն[4359]։ 5 Զայս տեղեկացեալ գիտասջի՛ք. թէ ամենայն պոռնիկ, կամ պիղծ, կամ ագահ, որ է կռապարիշտ՝ ո՛չ ունի ժառանգութիւն յարքայութեանն Քրիստոսին եւ Աստուծոյ[4360]։ 6 Մի՛ ոք զձեզ խաբեսցէ բանիւք սնոտւովք. զի վասն ա՛յսորիկ իսկ գայ բարկութիւն Աստուծոյ ՚ի վերայ որդւոցն անհաւանութեան[4361]։ 7 Մի՛ այսուհետեւ լինիք բաժանորդք նոցա։ 8 Զի թէպէտ եւ երբեմն էիք խաւար, արդ՝ լո՛յս էք ՚ի Տէր, իբրեւ զորդի՛ս լուսոյ գնացէ՛ք. 9 զի պտուղ լուսոյ ամենայն բարութեամբ է՝ եւ արդարութեամբ՝ եւ ճշմարտութեամբ[4362]։ 10 Փորձեցէ՛ք՝ զի՛նչ է հաճոյ Տեառն[4363]. 11 եւ մի՛ կցորդ լինիք անպտղութեան գործոցն խաւարի. այլ մանաւանդ յանդիմանեցէ՛ք։ 12 Զի որ ՚ի ծածուկ ինչ գործի ՚ի նոսա, զայն եւ խօսե՛լ աղտեղի է[4364]։ 13 Այլ ամենայն ինչ յանդիմանեալ ՚ի լուսոյ՝ յայտնի՛ լինի. զի ամենայն ինչ որ յայտնի է՝ լո՛յս է։ 14 Վասն որոյ եւ ասէ. Արի՛ որ ննջեսդ, եւ կանգնեա՛ց ՚ի մեռելոց, եւ լուսաւորեսցէ զքեզ Քրիստոս[4365]։ թկ 15 Տեսջի՛ք որպէս ճշմարտիւ գնայցէք. մի՛ իբրեւ անիմաստք[4366], 16 այլ իբրեւ իմաստո՛ւնք. գնեցէ՛ք զժամանակս, զի աւուրքս չարութեա՛ն են[4367]։ 17 Վասն այնորիկ մի՛ լինիք անմիտք, այլ իմացարո՛ւք զինչ են կամք Տեառն[4368]։ 18 Եւ մի՛ արբենայք գինւով, յորում զեղխութի՛ւն է. այլ մանաւանդ լցարո՛ւք Հոգւով[4369]. 19 խօսել ՚ի սիրտս ձեր սաղմոսիւք եւ օրհնութեամբք, եւ երգովք հոգեւորօք. երգել եւ սաղմոսել ՚ի սիրտս ձեր Տեառն[4370]։ 20 Գոհացարո՛ւք յամենայն ժամ ՚ի վերայ ամենայնի, յանուն Տեառն մերոյ Յիսուսի Քրիստոսի՝ Հօ՛րն եւ Աստուծոյ. 21 հնազա՛նդ լերուք միմեանց երկիւղիւն Քրիստոսի[4371]։

Թ 22 Կանայք՝ իւրեանց արանց հնազա՛նդ լիցին իբրեւ Տեառն[4372]. 23 զի այր է գլուխ կնոջ, որպէս եւ Քրիստոս գլո՛ւխ է եկեղեցւոյ. եւ ինքն է Փրկիչ մարմնոյ[4373]։ 24 Այլ որպէս եկեղեցին հնազանդ լինի Քրիստոսի, նոյնպէս եւ կանայք իւրեանց արանց յամենայնի[4374]։ 25 Արք՝ սիրեցէ՛ք զկանայս ձեր. որպէս եւ Քրիստոս սիրեաց զեկեղեցի, եւ զանձն իւր մատնեաց վասն նորա[4375]. 26 զի զնա սրբեսցէ՛ սրբութեամբ աւազանին բանիւ. 27 զի կացուսցէ ինքն իւր յանդիման փառաւո՛ր զեկեղեցի, զի մի՛ ունիցի ինչ արատ, կամ աղտեղութիւն, կամ ա՛յլ ինչ յայսպիսեաց. այլ զի իցէ սո՛ւրբ եւ անարատ[4376]։ 28 Նոյնպէս պարտին արք սիրել զիւրեանց կանայս, իբրեւ զիւրեանց մարմինս. որ սիրէ զկին իւր, զանձն իւր սիրէ[4377]. 29 զի ո՛չ ոք երբէք ատեայ զանձն իւր, այլ սնուցանէ եւ դարմանէ՛ զնա, որպէս եւ Քրիստոս զեկեղեցի[4378]. 30 զի անդա՛մք եմք մարմնոյ նորա, ՚ի մարմնոյ նորա եւ յոսկերաց նորա[4379]։ 31 Վասն ա՛յսորիկ թողցէ այր զհայր եւ զմայր իւր, եւ երթիցէ զհետ կնոջ իւրոյ, եւ եղիցին երկոքին ՚ի մարմին մի[4380]։ 32 Խորհուրդս այս՝ մե՛ծ է, բայց ես ասեմ իսկ ՚ի Քրիստոս, եւ յեկեղեցի[4381]։ 33 Այլ եւ դուք նոյնպէս մի ըստ միոջէ. զի իւրաքանչի՛ւրոք զի՛ւր կին՝ այնպէս սիրեսցէ՝ իբրեւ զի՛ւր անձն. եւ կին երկնչիցի՛ յառնէ իւրմէ[4382]։

6
Գլուխ Զ

թդ 1 Որդիք՝ հնազա՛նդ լերուք ծնողաց ձերոց ՚ի Տէր. զի ա՛յն է արժանն[4383]։ 2 Պատուեա՛ զհայր քո եւ զմայր. որ է առաջին պատուիրան յաւետիսն[4384]. 3 զի քեզ բարի եղիցի, եւ երկայնակեա՛ց լինիցիս ՚ի վերայ երկրի[4385]։ 4 Հա՛րք՝ մի՛ զայրացուցանէք զորդիս ձեր, այլ սնուցանիջի՛ք զնոսա խրատու եւ ուսմամբ Տեառն։ 5 Ծա՛ռայք՝ հնազա՛նդ լերուք տերանց ձերոց մարմնաւորաց, ահի՛ւ եւ դողութեամբ եւ միամտութեամբ սրտից ձերոց՝ որպէս եւ Քրիստոսի։ 6 Մի՛ առ ականէ՛ ծառայել իբրեւ մարդահաճոյք. այլ իբրեւ ծառա՛յք Քրիստոսի առնել զկամս Աստուծոյ[4386]. 7 սրտի մտօք ծառայել իբրեւ Տեառն, եւ մի՛ իբրեւ մարդկան։ 8 Գիտասջի՛ք թէ իւրաքանչիւրոք՝ որ զինչ առնէ զբարին, զնո՛յն ընդունի ՚ի Տեառնէ՝ եթէ ծառայ եւ եթէ ազատ[4387]։ 9 Եւ դուք տեա՛րք՝ զնո՛յն առնիջի՛ք առ նոսա. ներելո՛վ առնել զպատուհասն. գիտասջի՛ք՝ թէ եւ նոցա եւ ձեր Տէր գոյ յերկինս. եւ ակնառութիւն ո՛չ գոյ առաջի նորա[4388]։

Ժ 10 Այսուհետեւ զօրացարո՛ւք Տերամբ, եւ կարողութեամբ զօրութեան նորա։ 11 Եւ զգեցարո՛ւք զսպառազինութիւն Աստուծոյ. զի կարօղ լինիջիք կալ ընդդէմ հնարից Սատանայի[4389]։ 12 Զի ո՛չ է մեզ պատերազմ ընդ մարմնոյ եւ ընդ արեան. այլ ընդ իշխանութիւնս եւ ընդ պետութիւնս, եւ ընդ աշխարհակա՛լս խաւարիս այսորիկ՝ ընդ ա՛յսս չարութեան որ ՚ի ներքոյ երկնից[4390]։ թզ 13 Վասն այսորիկ առէ՛ք զսպառազինութիւնն Աստուծոյ, զի կարօ՛ղ լինիցիք ՚ի դիմի հարկանել չարին յաւուրն չարութեան[4391]։ 14 Եւ իբրեւ զամենայն ինչ կատարիցէք, հաստատո՛ւն կացէք. զտեղի՛ կալջիք, պնդեալ զմէջս ձեր ճշմարտութեամբ, եւ զգեցեալ զզրահսն արդարութեան[4392], 15 եւ ագուցեա՛լ զոտս պատրաստութեամբ աւետարանի՛ն խաղաղութեան[4393]։ 16 Եւ ՚ի վերայ ամենայնի առէ՛ք զվահա՛նն հաւատոց. որով կարօղ լինիջիք զամենայն նետս մուխս չարին շիջուցանել[4394]. 17 եւ առէ՛ք զսաղաւարտն փրկութեան, եւ զսուսեր Հոգւոյն՝ որ է բանն Աստուծոյ[4395]. 18 ամենայն աղօթիւք եւ խնդրուածովք՝ աղօթս առնել յամենայն ժամանակի Հոգւով. եւ ՚ի նոյն տքնեսջի՛ք ամենայն ժուժկալութեամբ՝ եւ խնդրուածովք՝ վասն ամենայն սրբոց[4396]։ 19 Եւ վասն ի՛մ. զի ինձ տացի բա՛ն ՚ի բանալ բերանոյ իմոյ, համարձակութեա՛մբ ցուցանել զխորհուրդս աւետարանին[4397]. 20 վասն որոյ պատգամաւորիմ կապանօքս. զի նովին համարձակեցա՛յց որպէս եւ պարտ իցէ ինձ խօսել[4398]։ 21 Բայց զի գիտիցէ՛ք եւ դուք զինէն զինչ գործիցեմ. զամենայն ինչ ցուցցէ ձեզ Տիւքիկո՛ս սիրելի եղբայր՝ եւ հաւատարիմ պաշտօնեայ ՚ի Տէր[4399]. 22 զոր առաքեցի առ ձեզ դմին իրի, զի գիտասջի՛ք դուք զմէնջ, եւ մխիթարեսջիք[4400]։ 23 Խաղաղութիւն ընդ եղբարս, եւ սէ՛ր հաւատովքն հանդերձ յԱստուծոյ ՚ի Հօրէ՝ եւ ՚ի Տեառնէ Յիսուսէ Քրիստոսէ[4401]։ 24 Շնո՛րհք ընդ ամենեսին՝ ոյք սիրեն զՏէր մեր Յիսուս Քրիստոս անեղծութեամբ[4402]։

Առ Եփեսացիս՝ գրեցաւ ՚ի Հռովմէ ՚ի ձեռն Տիւքիկոսի։ Տունք յժ̃բ։